政壇：白鴿抬轎 撐刀疤剛入法團
前年佔領行動期間，壹傳媒集團前主席黎智英（肥佬黎）一直鎮守金鐘「皇座」扮指揮，期間黑幫人物「刀疤剛」李繼剛被拍到長期傍實肥佬黎，「刀疤剛」更走入立法會同民主黨（白鴿黨）立法會議員單仲偕（單雞）會面，三人關係耐人尋味。正當大眾對白鴿黨、黎智英、「刀疤剛」嘅關係充滿疑惑之際，有讀者爆料，指單雞同黨友中西區區議員許智峯喺一個業主大會中支持「刀疤剛」出任業主立案法團委員，質疑當中是否有圖謀。
（設計圖片及對白）
佔領行動期間，「刀疤剛」（右）經常現身金鐘佔領區傍實肥佬黎（左）。 （資料圖片）
「刀疤剛」（右）曾護送肥佬黎（左）離開佔領區，上車前握手道別。 （資料圖片）
「刀疤剛」（圖）曾帶隊進入立法會大樓稱與單仲偕會面。 （資料圖片）
有自稱是筲箕灣東濤苑居民尋日爆料，指控單仲偕同許智峯於上月二十八日出席東濤苑居民大會，利用手上授權書，投票支持「刀疤剛」出任業主立案法團成員，引起大批居民不滿，並進一步指證白鴿黨同黑幫過從甚密。
單雞 峯鴿 受託投票
許智峯接受查詢時解釋，當時是受一位姓周嘅業主所託出席業主大會，佢承認按照姓周業主的要求投票畀「刀疤剛」，但指自己只係得一票，唔可以左右選舉結果。問到是否認識「刀疤剛」，佢指係當日在現場認識，不存在專程到場支持。據許智峯所知，單仲偕是受另一位業主所託出席會議同投票，而許自己未完場就因要事離開，本報截稿前仍未獲單仲偕回覆。
事實上，「刀疤剛」、黎智英同白鴿黨嘅關係千絲萬縷。首先，「刀疤剛」喺佔領行動時經常現身金鐘佔領區傍實肥佬黎，貼身護送黎出出入入，又與黎同一帳篷下密密斟。「刀疤剛」又曾經以與單仲偕見面為名，帶大批人進入立法會大樓，可見佢同白鴿黨關係匪淺。事實上，肥佬黎曾自爆係經單仲偕介紹認識「刀疤剛」。最後，白鴿黨曾被爆出涉收取肥佬黎千萬元捐款，三者關係可謂環環緊扣，相信白鴿黨有必要就事件向公眾解釋清楚。
