政壇：葉國謙欽點接班人落選
本報早前率先報道，擔任三屆共十二年立法會區議會（一）功能界別議席嘅建仔葉國謙，唔再競逐九月立會選舉，該黨內部並以一人一票方式，由百多名區議員選出代表接棒。投票期前日下晝結束，尋日上午喺黨總部開箱點票，據悉候選人之一、北區區議員劉國勳所得票數大幅拋離其餘三名對手，該黨將喺下周二晚上嘅中委會通過這次遴選結果。今次結果意味着葉國謙「欽點」嘅接班人、中西區區議會副主席陳學鋒接棒無望，未來四年將會繼續喺地區服務。
參加今次議席內部遴選嘅包括劉國勳、陳學鋒、觀塘區議會副主席洪錦鉉同深水埗區議員鄭泳舜。據了解，今早四名候選人喺黨總部見證點票，結果一如所料係劉國勳獲得最多票數，如無意外將會接手呢個議席。劉國勳接受查詢時堅稱，下星期二晚先公布結果，目前心情緊張；陳學鋒就話「無論贏同輸都唔會講」；洪錦鉉則係唯一承認落敗嘅人。
有黨內人士透露，劉國勳喺遴選前已成功爭取港島區同九龍區嘅黨員支持，當時唔少人已答應會投票畀佢，遴選開始後佢再落力箍票，造就今日壓倒性結果。消息又指陳學鋒最初連二十名區議員嘅提名都唔夠，要黨友幫手先勉強「入閘」，所以佢落選不足為奇。
