政壇：林大輝大賣廣告 推銷自己間中學
立法會工業界議員林大輝尋日出席立法會民政事務委員會時大賣廣告，搞到金融界議員「星爺」吳亮星都忍唔住笑，話大輝好快會收到廣告費用單據，到底係乜嘢咁值得大輝落力推銷呢？
林大輝
吳亮星
話說會議討論到青少年嘅體育發展，大輝提到體育學院、林大輝中學同英基學校合作嘅夥伴學校計劃，質疑政府數字唔得清晰。在席議員一聽到林大輝中學就大笑，但大輝就氣定神閒，反而叫大家靜啲咪咁興奮，講明該校係由佢創辦，仲講埋學校地址當利益申報添！
其後人民力量議員「慢必」陳志全就建議全港學生習泳，認為愈早學識游水愈易上手，仲透露自己泳術差。點知大輝又把握到機會，話學校每年暑假都舉辦游泳班，仲拍晒心口話「六堂教曉」，叫慢必介紹唔識游水嘅朋友去佢間學校報名。
