政壇：預算案提問爆棚 狂燒錢逾三千萬

以八百四十八條問題衞冕「問題王」嘅社福界議員張國柱話，因為有啲問題係代社聯同民間團體提問，所以提問數量增加，而作為社福界代表，佢又要問好多數據去分析每年嘅趨勢，例如綜援數字。對於被指狂問問題浪費公帑，佢建議社會福利署或政府可自願提早公布數字，就唔使議員追問喇，至於係咪浪費，市民自有公論喎。

排第二位係提問七百七十六條嘅張超雄，郭家麒以五百八十一條排第三。喺新界東補選勝出嘅楊岳橋亦首次入書面提問，由於佢上任議員當日就係提交問題嘅截止日期，所以只趕及提交三十九條，主要係同社會福利有關。據聞財委會主席陳健波將七千多條問題交畀政府後，發現有百幾二百條問題存有灰色地帶，亦有十幾條問題唔相關，但佢仍會盡量批准議員提問。

其實政府已多次就議員嘅書面提問「詐型」，財經事務及庫務局局長陳家強喺兩年前曾經講過，由於問題太多，政府要安排八十個人員連日趕工，以致每條問題成本高達四千八百元。按照呢個數字，再計算呢兩年嘅通脹，今年一條問題成本已升至五千一百元，而七千多條問題即花逾三千七百五十萬元。若根據工聯會議員王國興嘅量化理論，七千多條問題可換到逾二百二十四萬罐午餐肉同一百七十四萬罐豆豉鯪魚。