庸官退休歎世界 賞罰不公禮樂壞

嗱，民航處處長羅崇文正係賞罰不公嘅典型例子。東方報業集團一三年起踢爆民航處連串大花筒兼管理混亂醜聞，羅崇文其身不正，先後遭審計署批評及被立法會帳目委員會強烈譴責，但佢居然若無其事，一直安坐其位，據講仲計劃喺五月提早退休，可獲取一筆過逾一千二百萬元退休金另加每月逾七萬元長俸添。庸官失職唔使受罰，反而有賞，你話呢個究竟係咩世界吖？仲有冇天理吖？

講起羅崇文嘅臭史，簡直長過古時女人嘅紮腳布。喺佢嘅帶領下，民航處唔止淪為獨立王國，新總部大樓更加淪為「豪華娛樂城」，卡拉OK房、鏡面舞蹈室、淋浴間、大電視等包羅萬有，一應俱全，唔知嘅以為去咗夜總會添。民航官僚仲嫌豪華娛樂城未夠大，居然喺未經批准下擅自改建一千五百平方米預留空間，何止大花筒，直頭係膽大妄為喇！

最離譜嘅係，民航處耗資十五億元購置嘅新空管系統問題多多，一再延誤啟用。當局話就話新系統將於今年六月投入運作，至今年底全面啟用。但正如立法會議員話齋，民航處已經唔係第一次拍心口話啟用新系統，最後次次都冇兌現，今次聽住先喇。

再講吖，新系統一延再延，證明問題唔少，就算今年真係可以投入運作，安全究竟有冇保障，真係令人懷疑。羅崇文拍拍籮柚走人，優哉游哉歎世界，但留低呢個爛攤子唔知點收科，萬一有乜冬瓜豆腐，咁又點計數先？佢需唔需要孭鑊呢？

事實證明，港府施政烏龍百出，唔係冇道理o架，羅崇文呢類庸官居然可以身居要職，唔出事至奇喇。古代唐太宗開創貞觀盛世，被譽為明君，皆因能夠知人善任，吏治清明，反觀今日港府渾渾噩噩，庸官當道，唔怪得民望低迷喇。

講開又講吖，港產官僚得過且過，玩忽職守嘅又點止羅崇文一個吖。假難民問題愈演愈烈，搞到治安惡化，民怨載道，當局唔係無知無覺，就係敷衍了事，到依家都諗唔到有效措施，你話係咪無能吖？其實，有人提議重設難民禁閉營，本來可以起到阻嚇作用，可惜港產官僚當成耳邊風，一味耍太極，問你服未！