政壇：搞搞政：舊電池救國教 近代史得啖笑
話說教育局局長「吳得掂」吳克儉早年推行德育及國民教育科搞到一鑊泡，更令國教胎死腹中。唔知係咪有人睇唔過眼，民政事務局前局長曾德成、全國人大常委范徐麗泰、基本法委員會副主任梁愛詩、警務處前處長李明逵同鮮魚行學校前校長梁紀昌等一班退休「舊電池」就宣布成立勵進教育中心，重新包裝中史、國情教育再上市。但係有關近代史實，就「講啲唔講啲」，較具爭議嘅國共內戰、六四事件等資料就通通欠奉，認真係「唔湯唔水」！
舊年中突然「樂意現在退休」嘅曾德成同班前高官、前校長等人尋日宣布成立教育中心，透過網站及唔同平台，增加年輕人對中國歷史、文化同國情嘅認識，吸引更多中學生選修中史科。首輪活動包括每年向十名本地大學歷史系優異生派發五萬元獎學金、組織本地教師到內地考察，同埋向全港中小學派發重新編製嘅中史參考書等，多項「銀彈」政策料未來三年要籌三千萬元營運。
避免爭拗 無意「洗腦」
雖然教育中心強調唔會一味「唱好」或片面地介紹國情，但就唔會觸及一九一一年辛亥革命後嘅近代史，例如國共內戰、六四事件同近年的人權問題等。點解唔提近代史呢？原因係有關歷史事件日日都有人講，中心再提，只會提供平台給大家爭拗、增加矛盾，希望中心資料庫係提供準確資訊畀年輕人喎。佢哋強調中心早喺舊年九月籌備，無政治目的、無意「洗腦」，亦唔係因應港獨思潮而成立，「既唔講選舉，亦唔講造王」。
近年教育界有唔少意見認為近代史正逢中國積弱，外族入侵，加強呢段時期嘅歷史教育，能有助提升國民身份認同，如果因為擔心提及近代史會掀起爭拗，真係「斬腳趾避沙蟲」，怕得要命。被問及係咪要代吳得掂出手推動國教，佢哋話唔評論現屆政府教育政策。不過，如果佢哋真係因為吳得掂推動國教不力而出手，就真係「五十步笑百步」喇！
