政壇：力撐灣仔小店剪「奇」髮

著名建築師Rocco嚴迅奇幫人設計建築物就多，但唔知佢個「一忽忽」咁獨特嘅髮型，又係邊個設計嘅呢？Rocco日前出席置地廣場藝術展覽開幕禮時話，佢個髮型係出自灣仔小店嘅髮型師手筆，佢不時都會幫襯小店，即使之前剪開嗰間捱唔住執咗笠，佢就繼續搵番其他小店，支持小本經營，所以好少幫襯大型連鎖髮型屋。講番當日嘅藝術展覽活動，Rocco介紹點樣喺人來人往嘅商場設計空中隧道用嚟懸掛藝術品，希望借隧道形空間分隔藝術品與商舖，等途人欣賞藝術品時，視線唔會被商店招牌影響干擾。