政壇：獅城考察撞車 議員有驚無險
立法會發展事務委員會周日展開為期四日嘅新加坡訪問之旅，不幸發生交通意外。團友之一嘅議員梁志祥，前日喺社交網站上載一張撞車相，話因為旅遊巴司機太心急，衝燈撞到前面一輛私家車，從相中可見前面私家車車尾凹陷，好彩喺旅遊巴上嘅一眾成員都無事。但由於撞凹人哋架車，估計都需要賠償，唔知係咪用公帑找數呢？
立法會議員乘坐嘅旅遊巴發生輕微交通意外。（互聯網圖片）
梁志祥（右）、謝偉銓（左）喺新加坡考察期間遇到黃志祥。（互聯網圖片）
梁志祥話前日參觀當地的水資源中心後，原本打算乘坐旅遊巴前往經貿辦出席宴會，點知旅遊巴司機心急衝交通燈，撞凹前面輛私家車車尾，旅遊巴車頭亦損毀，一眾議員因此而要步行半公里去經貿辦食飯。佢話司機係當地人，第一日坐車已經心驚膽戰，點知真係出事，但無人受傷算係不幸中嘅大幸喇！
今次訪問之旅，梁志祥仲巧遇新加坡富豪、信和置業主席黃志祥，於是同隨行嘅議員謝偉銓一齊喺藝術科學博物館對岸合照留念，唔知三人見面會傾啲乜嘢呢？
