最近特首CY梁振英同女兒梁齊昕「同病相憐」，遇到唔如意嘅事情發生。社交網站facebook（fb）喺上月二十六日開始，新增包括「嬲嬲」（Angry）等五個表情符號，綜合CY個人fb內嘅留言貼，截至尋日已獲得逾一百萬個「嬲嬲」，單係其fb頭像已獲得逾十九萬個「嬲嬲」，其他留言貼嘅「嬲嬲」數目似乎仍有上升趨勢，未知正喺內地出席論壇嘅CY有乜嘢感受？

梁振英facebook所有留言貼已經獲得逾一百萬個「嬲嬲」。（互聯網圖片）

梁齊昕自稱突然暈倒，醒來時右眼上方已縫上多針。（互聯網圖片）

另一邊廂，身在美國嘅梁齊昕喺Instagram帳戶上載最新照片，顯示其右眼上方受傷，要縫上多針，佢留言話自己突然暈倒，清醒時已喺當地一間醫院，而且「斷片」失去事發時嘅記憶，並留下主題標籤（hashtag），指正等待傷口嘅疤痕痊愈，多名網友其後留言，都祝願齊昕保重身體，又提醒要戒口，唔好進食雞蛋、蝦蟹等食物。如果齊昕不幸留下疤痕，睇嚟要去韓國一趟喇！

第一手消息請下載on.cc東網iPhone/iPad/Android/Windows Phone Apps