喺前年佔領行動期間領導學界嘅香港專上學生聯會（學聯）上星期舉行會員大會，本土派同溝通派「左膠」喺會上就修章問題各持己見，最後投票人數不足，搞到流會收場兼要擇日再開會。由於修章不成就唔可以重選秘書長，所以秘書長之位將無限期懸空，本來已經只剩下半條人命的學聯又再群龍無首。

學聯上周六開始，一連三日舉行一年一度嘅會員大會，會議一開始就出師不利，被視為本土派代表嘅中大本土學社召集人何鈞同埋中大學生會前外務秘書陳旻羲，呢兩名秘書長候選人因不滿會章「上莊選下莊」嘅規定而宣布退選，要求會員大會先修章，再重啟遴選程序。按程序，就算順利喺三日內完成修章，都需要一個月時間重啟遴選程序，換言之學聯秘書處最少出現一個月真空期，而呢段時間會由代表會暫時支撐。

缺莊退聯 內憂外患

但世事豈能盡如人意，據聞本周一嘅會議代表，喺修章問題上得唔到共識，最後投票時，更加因為唔夠人而流會。其中一個爭議係有本土派覺得要將修章權下放落代表會，而溝通派就覺得要維持會員大會權力，以免學聯一個唔覺意被代表會解散。不過，本土派似乎喺呢個議題上得到唔少支持，溝通派或者要搵多啲人去投票，先可改變劣勢喇！

學聯預計本周六會再次開會，如果修章一事仍然膠着，照道理就唔可以重啟遴選程序，到時秘書長之位就會繼續懸空喇！話時話，學聯舊年因退聯事件，成員院校已由八間變四間，新一波退聯潮未到，又出現修章同缺莊問題困擾，都算係內憂外患樣樣齊嘞！到底今屆學聯能唔能夠喺混亂之中重整旗鼓呢？真係要放長雙眼睇下。

第一手消息請下載on.cc東網iPhone/iPad/Android/Windows Phone Apps