頭痛醫頭，腳痛醫腳，係港產官僚嘅例牌動作。公立醫院人手長期短缺，當局一直闊佬懶理，次次都要等到危機來臨至急急補鑊，結果次次都倒瀉籮蟹，七國咁亂。

呢，本港正值流感高峰期，公立醫院農曆新年已出現人滿之患，最近更全線逼爆，前線醫護人員固然做到踢晒腳，病人亦怨聲載道，有人等咗三日仲未上到病房，問你怕未。醫管局臨急抱佛腳，推出所謂五項救亡措施，點知解決唔到問題不特止，反而因為護士被要求為病人配藥而引起爭議，搞到要緊急煞停，你話係咪添煩添亂吖。

正如「東方報業民意調查」顯示，大部分受訪者批評醫管局管理不善，資源錯配，導致前線人手不足，疲於奔命。而最令人詬病嘅係，醫管局從來唔識吸取教訓，做好應變措施。

冇錯嘞，流感高峰期年年都有，如果醫管局能夠未雨綢繆，及早防範，又點會次次都咁狼狽吖。係人都知，公立醫院服務長期超出負荷，前線人員早就怨氣沖天，而醫管局從來冇認真處理，一味敷衍了事，導致問題不斷惡化。試諗吓，爆發普通流感已經搞成咁，萬一出現其他大型疫潮，咪隨時死得人多？

正所謂，工欲善其事，必先利其器，改善醫療設施，增加前線人手，先至係紓緩公院壓力嘅治本之道，當局唔肯正視問題，推出乜嘢救亡措施都係嘥氣。好簡單，家陣公院護士與病人嘅比例達到一比十二，比國際一比六嘅標準超過一倍，都咪話唔誇張。前線人手不足，病人成為受害者，唔怪得近年公立醫院頻頻發生事故喇。老實講，由護士為病人配藥嘅建議好彩被煞停，如果唔係，隨時又出事嘅咋。

上述民調顯示，大部分受訪者對醫管局嘅管理感到失望，認為資源未能到達前線，七個蓋十個煲，無法挽留醫護，形成惡性循環；而對於醫管局考慮暫停公立醫院非緊急服務，大部分受訪者指反映公共醫療系統千瘡百孔，一味挖東牆補西牆，根本無濟於事。

講到底，治病必求於本，想解決公共醫療問題，首先要改善醫管局嘅管理。港府醫療撥款年年增加，但係公立醫院逼爆問題唔單止冇緩和，反而不斷惡化，咪就係因為未根治醫管局呢個病源囉。如果當局再唔正視公共醫療問題，唔止醫護人員憤怒了，病人亦隨時上街抗議都似！叮！