城中鏡：囡囡唔黐身 Ana R.妒夫
名模Ana R.尋日以黑色透視裙出席活動。佢話女兒留喺屋企，由老公照顧，並笑言：「老公上星期都照顧咗囡囡幾個鐘，佢對做保母都幾有興趣，但就好緊張，經常會打電話同傳短訊畀我問我要點做。」佢又話囡囡好黐老公，每次見到爸爸，都會笑得很開心，令佢有啲嫉妒，坦言囡囡係老公嘅情人。
Ana R.覺得畀小朋友學運動係好事。
Boris Becker親身支持慈善活動。
初遇Boris Becker興奮
同場有著名嘅網球好手Boris Becker，Ana話係第一次見對方，大感興奮，佢話讀書時曾接觸網球，但就缺乏呢方面嘅天分，問到將來會唔會畀囡囡學網球？佢話：「會，我覺得畀小朋友學運動係好事，會畀佢試唔同運動。依家囡囡每星期上一次playgroup，我都有參加好多媽咪group，畀囡囡接觸多啲同齡嘅小朋友，初時都擔心佢唔鍾意，但佢好喜歡，我唔想佢怕醜，我希望培養小朋友外向同獨立性。」
轉頭見到名模Janet馬詩慧同大女王曼喜及王躍穎，Janet話今次唔係首度見Becker，又話：「之前o係打高爾夫球既活動見過佢，佢同我老公打過高爾夫球。小朋友細個學網球嘅時候，我有打過幾場，我都幾鍾意，我好鍾意打中時嗰啲卜卜聲。」至於王曼喜指現在忙於為其有機時裝網站工作，提到Kee Club太子女龍殿兒話其時裝品牌有意搵曼喜做模特兒，曼喜話：「我哋係好朋友，佢有幫我個網站手，如果佢需要我幫手，我一定幫。我哋巿場唔同，永遠係良性競爭。」
