城中鏡：車天車地
尋日沙田馬場有名車品牌舉行香港打吡大賽，唔少愛車名人均盛裝出席支持。在場見到馬會主席葉錫安，講起揸車，唔知佢做車主嘅年資耐啲，定做馬主年資比較耐呢？佢就話梗係車主喎！但中華廠商聯合會副會長史立德嘅仔女史佩加同史昊洺就好幸福，事關年紀輕輕就已經做馬主先過車主！
史佩加（左）同史昊洺喺做車主前已先做馬主。
劉家輝（右）同埋葉錫安傾得咁肉緊，莫非正講到市道低迷嘅情況？
霍麗萍（右）除咗駕車觀賞香港景色外，就選擇以拍攝欣賞香港，左為老公John。
出席活動嘉賓眾多，包括愛沙尼亞共和國駐港名譽領事林建康同太太林黃寧艷、霍麗萍同老公John、律師會前會長王桂壎同太太Angela。講起做馬主，史佩加話最初係爸爸加埋佢個名落去，一家人撐愛駒，而佢近年先做車主，考車牌後，都係揸緊部老爺車。卓能集團非執董趙式浩就話自己平常駕駛嘅係日本車，因為佢哋做工程常落地盤，最緊要實用，唔驚刮花整污糟。
霍麗萍鏡頭捕捉香港
林黃寧艷當年喺英國讀書，一夠年齡已經考咗車牌，事關佢全家人都覺得駕駛係好基本嘅技能，一定要學識，但依家有兩個小朋友之後，就好少再自己揸車喇！對於寶馬香港區董事總經理劉家輝就笑笑口話自己做車主就可以，但做馬主就要儲多啲錢同學習多啲有關知識先得，仲話喺市道低迷，好難提升業績，反而係要保持良好服務質素，不讓客人流失之餘，要令佢哋更加印象深刻。
除咗駕車觀賞香港景色外，霍麗萍就選擇拍攝欣賞香港，佢話早幾年除咗有影低家族大宅面貌，仲有拍攝本港各區風景，但佢慨嘆依家好多地方已經唔同晒喇！
