如外間預料,成立近五年嘅學民思潮(學民)喺尋日宣布停止運作,成員會一分為二,過檔新政黨及新學生組織,以分頭並進嘅方式繼續運作。學民召集人黃之鋒表明,新政黨唔會收取學民嘅任何撥款。但記者會一完,就有讀者爆料,指黃之鋒上星期仍打算將學民其中一百二十萬元資金撥入新政黨做創黨經費,只係事件曝光後,先即時改變決定。不過,即使佢將學民一半資金撥畀新學生組織,仍有支持者指有違當初捐款畀學民嘅原意,提議成立「學民苦主大聯盟」追討捐款。

學民宣布解散,過百萬嘅資產何去何從,相信要向公眾交代清楚。黃之鋒指學民一百四十五萬元資產會分成兩份,其中七十萬元會用作成立新學生組織嘅創會同運作經費,而另外七十五萬元,就會撥入新成立嘅「學民思潮法律援助基金」,以支援日後所有學民成員之前參與行動後所面臨官司、審訊同檢控所需嘅律師費用。所以由黃之鋒同學民前成員成立嘅新政黨,將唔會接收學民一分一毫。

25萬資金去向不明

不過,以上講法就同網上流傳一段黃之鋒三月十四日喺社交網站提及學民解散之後嘅財政安排留言有所出入。嗰段留言題為「學民思潮最後一次成員會議」,建議將學民一百二十萬元資金撥入新政黨,作為創黨經費,而新政黨會承擔學生因參與行動而涉及嘅律師費,而另外五十萬元就會撥入新學生組織做創會經費,並喺三月六日會議上獲通過。值得留意嘅係,網上原方案總金額是一百七十萬元,而尋日公布嘅方案總金額係一百四十五萬元,短短兩星期之間就少咗二十五萬元資金,資金去向確係一個謎。

黃之鋒接受查詢時承認,會上曾討論有關撥款予新政黨嘅方案,評估唔同因素,考慮公眾對捐款期望之後,決定新政黨唔收取學民一分一毫。問到點解會咁樣重新分配資產,學民發言人黃子悅解釋,新學生組織頭幾年嘅籌款能力或較低,所以將其中七十萬元分撥予新學生組織作初期運作嘅經費。不過,學民「分身家」惹嚟網民熱議,指當初支持者係捐款畀學民,質疑點解新學生組織可以收取學民嘅資金,更有人提議成立「學民苦主大聯盟」追討捐款。

黃之鋒「太上皇」聽政

對於點解唔保留學民,卻非成立新學生組織不可,有說法係:如果學民唔解散,又點樣「分身家」?學民撥款畀新學生組織後,將來黃之鋒打骰新政黨之餘,亦成為新學生組織嘅「太上皇」,「垂簾聽政」。不過,將成為新學生組織負責人嘅黃子悅就解釋,過去學民高度政治化,令佢哋好難喺校園推動公民教育,希望成立新組織集中教育議題有助改善問題。呢個解釋係咪令人信服,大家自行判斷喇!

第一手消息請下載on.cc東網iPhone/iPad/Android/Windows Phone Apps