政壇：楊張新悅錫女 謝絕壓力
教育局前政治助理楊哲安嘅太太楊張新悅，尋日帶同十七個月大嘅細女出席慈善活動，佢話今次活動係捐助有病嘅兒童接受手術，所以特登嚟支持，有錢出錢，有力出力咁話。
楊張新悅帶埋十七個月大嘅細女一齊出席活動。
傾到最近唔少學童自殺，身為三女之母嘅佢，坦言有為此而反省，佢話：「我有諗點去畀一個有愛嘅環境去保護小朋友，唔想畀壓力佢哋，因為香港係一個都巿，無論生活空間同思考空間都好細，應該畀小朋友有成長空間，我會畀佢哋犯錯，再去思索，就算考零雞包都可以。」
問到學校有冇壓力畀小朋友，佢話：「冇任何壓力，我都冇畀，我都學緊點樣唔畀壓力小朋友。依家發生呢啲事，唔只係教育制度，而係成個大氣候，個個都想小朋友做尖子、出人頭地，但係咪畀最多最好，就係對小朋友好呢？例如我o岩o岩考到車牌就畀部法拉利我，可能會撞車喎，應該唔好畀咁多物質，而係畀多o的愛。」
