喺標準工時立法事宜上，勞工界同商界嘅立場南轅北轍。早前一班勞方委員更齊齊拉隊離開標準工時委員會，雖然勞工及福利局局長張建宗落足嘴頭，力邀勞方委員回歸，但都係不得要領。張建宗尋日趁出席工聯會立法會議員「阿王」王國興喺小西灣嘅議員辦事處開幕禮，同坐隔籬嘅勞方委員、工聯會理事長吳秋北密斟，可惜吳秋北最後都係請張建宗食大檸檬。

張建宗（中）動之以情，游說吳秋北（右）返回標時談判桌，可惜慘食檸檬。

現場所見，張建宗主動同吳秋北傾偈，期間仲輕拍吳秋北手臂，扮晒老友，但最後都係游說唔到吳秋北改變初衷。吳秋北事後話張建宗立場一貫，無實質行動可以令佢哋回心轉意，所以勞方會繼續杯葛標時委員會第二輪諮詢，仲會另起爐灶，廣邀勞工界出席四月中舉行嘅大會表達訴求。

講番阿王新議員辦事處，主要因為佢當選東區區議員而開設，但就比前任黨友陳靄群辦公地方仲要細咗。點解？原來佢間咗一半地方，借畀街坊開會、搞工作坊同自修室，又喺辦事處外加設電子板同電視螢幕，日日loop住佢「日以繼夜、夜以繼日」嘅金句同立法會開會情況，睇怕居民想唔記得佢啲金句都好難喇！

第一手消息請下載on.cc東網iPhone/iPad/Android/Windows Phone Apps