經過前年佔領行動同上月立法會新界東補選之後，社會上醞釀一股新舊交替嘅呼聲，唔同政黨都有立會元老宣布唔再競逐連任，但唔係個個政黨都可以順利交接，好似民協就仍然畀班老鬼把持，搞到一班中生代要靜靜起革命。民協中委會早前甄選立會選舉參選人，傳聞會上有人投票時，唔聽一眾元老嘅意見，執意要搵較年輕嘅新任黨主席莫嘉嫻代替深水埗區議員譚國僑參選立會九龍西。知情人士又話，莫嘉嫻暫時喺黨內被看高一線，睇嚟譚國僑氣數已盡。

四年前立會選舉，民協唯一立法會議員KK馮檢基將老巢九龍西交棒畀譚國僑，而自己就轉戰超級區議會議席，但譚國僑有負所託，當年票數排第六出局。雖然如此，KK等元老仍計劃留譚國僑出戰九西選區，希望可以因為議席增加，博到最後一席，但如意算盤似乎並非容易打得響。

黨內關係好 深得支持

民協近月舉行多次會議，討論九月立會選舉人選，有傳會上有會員投票時，唔聽一眾元老嘅意見，執意要以較年輕嘅莫嘉嫻代替譚國僑參選九西，搞到黨內向傳媒公布參選意向時，出現九西參選人鬧雙胞嘅局面。知情人士透露，莫嘉嫻深得黨內支持，特別同一齊搞「月經假期」嘅黨友非常投契，就算今次加入民調同論壇計分，相信今次革命仍好大機會成功，到時譚國僑政治生涯就真此玩完。話口未完，有人發現莫嘉嫻同部分民協區議員「孖公仔」出現喺橫額之上，似乎係為出選九西鋪路。

其實，當社會要擺脫老人政治形象嘅時候，譚國僑一而再參選，似乎真係講唔過去，再者譚國僑喺民協三十幾年，主席又做過，立會又選過，際遇都算係唔錯喇，呢個時候，係咪要諗吓退位讓賢，畀啲後生發揮，令民協有更大發展呢？

第一手消息請下載on.cc東網iPhone/iPad/Android/Windows Phone Apps