難民罪案鑊鑊甘 解鈴還須繫鈴人

正所謂，人蛇滾滾來，罪案密密爆，假難民問題不斷惡化，搞到香港烏煙瘴氣，唔到港府唔正視。淨係元朗咋，近日就發生多宗涉及假難民嘅罪案，先有男子當街被搶去五千元現金，再有少年被搶去遊戲卡，更恐怖嘅係有少女被南亞假難民當街非禮。假難民無法無天，搞到居民人心惶惶，有人建議組織自衞隊防範假難民，太一叮絕對贊成，港府無能，警方無力，居民除咗自保之外，仲有乜選擇？

最離譜嘅係，警方日前喺尖沙咀及旺角進行反罪惡行動，居然遭遇「毒假難民」瘋狂反抗。一名非洲假難民懷疑吸完冰毒，喺尖沙咀手握木棍遊蕩，警方接報到場，混亂間冰壺碎裂，割傷警員。另一名南亞假難民則懷疑喺旺角毒窟爬渠逃捕，失足墮樓重傷。

大家睇到嘞，假難民罪案無日無之，鑊鑊新鮮鑊鑊甘，搞到香港七國咁亂。去年涉及刑事罪行被捕嘅假難民多達一千一百幾人，較前年暴增六成七；而元旦至今警方已拘捕二百多名南亞偷渡人蛇，超過去年總和，證明香港已經淪為難民港、罪惡城。

所以話，傳媒發揮第四權天職，堅持不懈揭發假難民惡行，目的就係要令港府正視問題，令市民提高警覺。可惜吖，港府話就話要檢討機制堵塞漏洞，但遲遲未有動作，加上司法縱容，假難民有恃無恐，唔搞到七國咁亂至奇吖。前保安局局長李少光就講得啱嘞，香港惟有退出聯合國《禁止酷刑公約》，先至可以永絕後患。法律界人士亦認為，港府應向中央爭取，要求聯合國增設保留條款，令公約有關收容酷刑聲請人士嘅條文不再適用於香港，變相達到退出公約嘅效果，當局聽到未呀？

唔係講笑，假難民唔止係治安毒瘤，而且係沉重財政負擔，下年度用於假難民嘅開支高達十七億元，比本年度增加近兩倍，再咁落去，香港唔止陸沉，直情破產都似。有人可能會問，點解傳媒日日報道假難民問題，好簡單啫，如果唔係港府無能，得過且過，傳媒又使乜苦口婆心吖，叮！