SUN焦點：信自己向自殺說不
向自殺說不！學生自殺接連發生，惹全港關注，記者近日訪問了三位曾企圖自殺，或有自殺傾向的年輕男女，他們因學業、朋輩關係及父母離異等問題，心理曾備受壓力，部分甚至患上抑鬱，但都能從情緒低谷急速反彈，不與他人比較成績，要相信自己能力，做自己快樂及滿足的事情，心境便會豁達開朗。他們寄語年輕人，解決問題方法總比困難多！
昊昊寄語年輕人，將問題交給時間，等時間將失意KO。
昊昊在手腕上紋上分號，提醒自己，現時人生只是分號，不是句號。（受訪者提供）
昊昊稱，面對困難時，勿認為找幫手是有問題。（受訪者提供）
Walker不開心時，看見心愛寵物，便會重現笑臉。
May認為家人的陪伴及支持，是令她渡過難關的重要因素。
昊昊：接納自己能力 做唔到唔好勉強
二十七歲的昊昊，中學時是同學眼中的天之驕子，讀band1中學、性格開朗、當模範生，高級程度會考前，家庭起了翻天覆地變化，「父母離婚，令我無心機考高考，成績好差，去台灣入讀某大學嘅音樂系，讀完返港，想貢獻社會，首份工做空中少爺，發現工作壓力好大，覺得自己好無用。」
「屋企只有媽媽、家姐同我，身為全家唯一男人，覺得自己要撐落去，但試過夜闌人靜時，情緒崩潰。」一年前一個晚上，他情緒低落，獨自進入九龍一幢唐樓，於樓梯不停上上落落，「我想喺天台做傻事，幸好腦海閃現一首自己較早時作嘅歌《明日晴》，其中歌詞喺『就算身濕透，腳步比以前踏實』。」
「呢首歌令我感受到，要接納自己能力，事情做唔到，唔好勉強。面對困難，千祈唔好覺得搵幫手就係有問題，就係軟弱嘅行為，於是向撒瑪利亞防止自殺會求助。」他寄語年輕人「將問題交畀時間，等時間將失意KO!」
近日，他在手腕上紋上一個分號，提示自己，現時人生只是分號，不是句號，「人生有快樂，也有氣餒時刻。
依家我做咗網台唱片騎師，雖然唔係大成就，但覺得搵到貢獻社會嘅地方。」
Walker：要同自己講 唔開心完要繼續努力
校園生活不愉快，是部分學生寫照，現時二十六歲的王偉匡Walker亦一樣，「我讀中五嗰陣，成績欠佳、性格內向、無乜朋友，到午膳時間，我見到同學一齊去食飯，但無人同我食，覺得好孤單、好驚。」這種恐懼，後來被證實患上抑鬱，他選擇逃學，「一個人，曾想過跳樓，但突然覺得，我係需要人陪多過想死，我向某間機構社工求助，情緒得以紓緩。」
「我繼續返學，但會考成續唔好，原校唔收讀中六，要轉到另一間中學。無諗過，呢次轉變係一個契機。喺新學校，一切重新開始！」他戰勝寡言性格，於新學校主動與同學交談，很快結交到很多好友，「溝通係雙向，你對人點，人哋自然會點樣對你。」喜出望外的是，他於校外更贏了校草殊榮，到中七更當上學生會主席。
抑鬱，在他生命中已煙消雲散。「我覺得有時唔開心，咪盡情唔開心囉，但要同自己講，唔開心完要繼續努力，搵到啱自己嘅路，唔好連自己都呃埋。」另外，他飼養多隻玩具貴婦狗，「唔開心，返到屋企門見到佢哋，就開心番晒。」
May：父母陪伴支持 令我渡過難關
部分學生遇到困難，會選擇不與家長分享，現時在本港某間大學讀三年級的阿May（化名），也是其中一位。「我對自己要求好高，但從小同父母關係麻麻，我唔識點同佢哋溝通，入咗大學後，我發覺好多同學都搏命讀書，大家有競爭心態，每日返學，搞到好大壓力。」
「兩年前，我讀大學一年級時，因呢個問題感到情緒低落，一個人喺屋企房裏面，服藥企圖自殺，幸被父母及時發現制止。無諗過，我哋因此打破隔膜，大家相擁而哭。喊完後，我發覺父母一直好重視我。媽媽怕我面對面講心事會難為情，佢用寫信方式，同我互訴心事，媽媽最令我窩心嘅一句係『無論你正經歷甚麼，我都會在你身邊，陪着你過。』」
「以前唔覺得父母重要，依家先知道佢哋嘅陪伴及支持，係令我渡過難關嘅重要元素。」在大學一年級下學期，她獲准暫時休學一學期，全情投入自己喜愛的手工藝製作，令情緒得以紓緩，「現時重踏校園，我已唔會同他人比較成績。人生，唔只得成績，搵到適合自己嘅路，先係最重要。」
文、圖：專案組
