城中鏡：行善樂難忘
唔少人喺公餘時間都鍾意做義工，服務社會之餘，又可以充實自己，仲有機會遇到好多特別嘅經歷添！好似商務及經濟發展局局長Greg蘇錦樑，早前出席「HK.WeCARE 香港開心D」大型義工同樂日時話，最難忘就係有一次去做失明人士嘅領跑員，點知對方仲跑得快過自己，對佢有好大啟發喎。咁嗰位失明人士咪要掉轉頭做阿Greg嘅領跑員？呢個經歷真係好難忘喎。
蘇錦樑自爆失明人士跑得快過佢。
李宗德（左）同鍾志平自細已經開始做義工。
莊偉茵孖住老公黃楚權一齊出席活動。
李宗德幾十年老義工
同樂日仲有多位名人參與，包括香港提升快樂指數基金主席吳宏斌、副主席Roy鍾志平同和富社會企業會長Joseph李宗德等，Joseph同阿Roy兩個嘅共通點，就係自細已經開始做義工。Joseph話讀喇沙時，學校已經有唔少義工團體，佢第一次參加嘅就係聖母軍，當時跟住去探訪有需要人士，就已經種下做義工嘅種子，至今就做咗幾十年義工，覺得可以識到好多朋友，又好有滿足感，仲將呢個優良傳統傳埋畀兩個女兒添！
阿Roy就話至今已經做咗幾千小時義工，做公職都係因為覺得好似做義工咁，認為幫人嘅感覺好好。中電企業發展總裁莊偉茵就同老公黃楚權一齊到場，佢話平日工作實在太忙喇，想做義工就會參加企業嘅義工隊，至於老公就去非牟利機構幫手，睇嚟佢哋兩公婆對社會服務都好有心喎。
