政壇：橄欖求解「圍」 向黎棟國伸冤
由於新春旺角暴亂導致多名警員受傷，有立法會議員提出質詢，關注前線警務人員嘅職業安全、裝備同訓練係咪足以應付暴亂。但近日女婿嘅雪糕店被網民起底兼圍攻嘅議員「橄欖」陳鑑林，就「搭單」向保安局局長黎棟國伸冤，離題指網上暴力愈趨嚴重，「對我嘅圍攻，甚至組織啲人去我屋企『圍我』，對我作出不利嘅行動，對我家人作出威嚇」，問到警方有乜嘢行動喎。難道議員連報警都會有特快通道？
女婿雪糕店被搞，莫非工聯會黃國健（右）安慰緊陳鑑林？
立會財務委員會代主席陳鑑林日前強行通過高鐵追加撥款，成為眾矢之的，近日盛傳銅鑼灣一間雪糕店由佢女婿創辦，有網民呼籲杯葛雪糕店，禍連女兒同女婿等通通被起底，橄欖出席會議時，亦藉有關旺角暴亂嘅質詢向黎棟國伸冤。
但黎棟國似乎唔明白橄欖嘅「心事」，只稱網上同現實世界嘅言論均受規管，警方喺前年佔領行動期間，多次就網上煽動行為執法，警方會對互聯網罪行加強偵查能力，對有人喺網上散播不合法言論唔會置之不理。咁講會唔會令橄欖安心啲呢？
