政壇：EQ評自殺 噏錯一個嫌少

多名立法會議員尋日就學生自殺事件提出口頭緊急質詢，點知議員EQ葛珮帆發言時，竟然話學生自殺事件「一個都嫌少」，隨即令其他議員嘩然。經在旁嘅議員提醒下，EQ知道自己講錯，立即澄清原本係想講學生自殺「一個都嫌多」，解釋因為有泛民主派議員要求響鐘點算會議法定人數，先令佢分神講錯，批評泛民喺呢個議題上仍響鐘點人數「拉布」，佢感到好難過。EQ又喺facebook為講錯嘢道歉，並批評泛民喺呢個議題上都響鐘點人數「拉布」，「為救救學生，大家可否放下爭鬥，不謾罵，多提意見，一齊為社會注入正能量？一味叫局長去死又點幫到學生呢？」佢話有研究指多接觸大自然會令人開心一點，又話「活著（着）需要理由」，認為在假日，家長同學生一同參與學校活動，有助學生學習思考活着嘅理由，欣賞生命，喺關鍵時刻可挽救生命。