政壇：冇樓難追女 獨男靠真愛
為娶「白富美」，80後理財顧問日瞓四粒鐘，趕上車、築愛巢。呢單「真的上車了」真人真事，依家網上熱爆，有網民葡萄話冇樓好難追女朋友，更何況娶美女。港女一定要嫁有樓男？
張天天話唔可以一竹篙打一船人，香港亦有唔少顧家女仔。
男主角張天天話：「唔可以一竹竿（篙）打一船人，香港亦有唔少顧家女仔，呢個要求亦唔過分，情侶間大可公一份、婆一份，齊齊努力上車！（我位）來自內地嘅未婚妻的確冇買樓要求，只求兩人過得開心就OK，即使租樓住、食二十幾蚊飯盒都一樣咁開心。」
港女們又點睇？「唔一定對方要有樓在手先結婚！」Mary話唔介意一齊努力儲錢，辛苦幾年再上車，「若要靠對方屋企人幫，好似暗示個男仔無上進心，我更加唔鍾意。」
Kristy就堅持，「一定要有樓先結！」寧願推遲結婚都希望先有樓、後結婚，但佢唔介意一齊儲錢上車夾份買。
網民Teresa就仲直接，「男揀女係女睇樣、睇身材，女揀男睇有冇樓好正常！」
本身係理財專家嘅康宏理財聯席董事梁惜君就話，樓唔係揀男人嘅首要條件，「如果唔愛佢，有樓都無用。」男士們，收到未。
