政壇：傳與主席唔啱 朱敏健將離監警會
獨立監察警方處理投訴委員會（監警會）自成為法定機構後，擔任首名秘書長嘅朱敏健將於明年一月約滿，監警會發言人指委員會自舊年十二月商討，決定委託專業人事顧問公司公開招聘，確保搵到最合資格嘅人選帶領秘書處，換言之，朱敏健將唔會續任。有傳朱敏健除咗考慮自己年屆退休年齡外，佢同主席郭琳廣不咬弦亦傳係唔想續任嘅原因。
有傳朱敏健（右）同郭琳廣不咬弦，朱唔再續任監警會秘書長。（資料圖片）
其實監警會自前年佔領行動後，一直是非多多，尤其係處理警司朱經緯涉毆打市民投訴中，就出現再投票事件，引起有人不滿，並將矛頭指向秘書處，經常問長問短，更屬意唔同朱敏健續約，決定喺舊年底開始揾獵頭公司另聘他人，朱敏健亦都心灰意冷，無興趣續任。
據知，朱敏健跟監警會前主席、資深大律師翟紹唐就合作無間，雙方非常有默契，但有時工作，真係人夾人緣。另外，監警會仲有四名高層離任，包括兩名高級審核主任同兩名高級經理，可謂多事之秋。
