政壇：搞搞政：張雲正忘年戀 撻着新聞官
依家官場嘅「鑽石王老五」只剩律政司司長袁國強同公務員事務局局長張雲正，而政務官出身嘅張雲正今年踏入五十四歲，官場對佢嘅風評唔錯，加上算幾有型，吸引到唔少女性，但係相信一眾「盛女」都要失望喇，事關最近官場盛傳佢已「名草有主」、「封盤」嘞，竟然與曾經共事過嘅「80後」二十幾歲嘅新聞主任（IO）「撻着」，共譜忘年戀，真係可喜可賀喇！
任職海關 邂逅佳人
據聞呢段戀情萌芽，始於張雲正喺一一年起出任海關關長時，同「80後」二十幾歲嘅新聞主任（IO）邂逅，及後開花結果。舊年七月，佢出任局長後，嗰位「80後」近期亦調任到其他政府部門出任IO，未知係咪避嫌。
仲記得舊年十一月，本報曾問佢有冇拍拖，佢當時大耍太極，回答「所有公務員都係心上人」，未知係咪隔空傳情，甚至係「撻着」嘅先兆呢？早前亦有報道，指佢為咗照顧年逾九十歲嘅母親，一直與母親同住香港仔中心一個四百呎單位，更指佢有時會選擇搭巴士返家，可能孝順節儉嘅一面，獲嗰位IO加分。本報曾向張雲正新聞秘書查詢局長拍拖一事，但至截稿前未獲回覆。
至於今年踏入五十二歲嘅袁國強，一直都無透露過感情生活，但喺一三年十二月有報道就指佢曾喺九十年代同女友擺過婚宴，但一直都無簽字結婚，幾年後佢就自爆單身。律政司發言人當時承認此事，有擺「婚宴」但無註冊，雙方及後決定分開，所以毋須辦離婚手續。不過，隨着張雲正「名草有主」，袁國強成為官場唯一「鑽石王老五」，唔知邊類型嘅女性先吸引到佢呢？
