旺角暴亂發生至今逾一個月仍餘波未了，公文袋「新丁」立法會議員楊岳橋當選唔夠一個月，已經速成學晒泛民主派嘅招數，尋日即刻同工黨何秀蘭以呈請方式，要求立法會成立專責委員會調查旺角暴亂。不過，同泛民往績一樣，立法會餘下任期四個月都無，開唔開得成會都成問題，加上以呈請方式成立嘅委員會不獲《立法會（權力及特權）條例》保障，無權傳召證人，實際上係「無牙老虎」，二人搞場大龍鳳都係齋抽水，煲無米粥。

政府一直拒絕成立獨立調查委員會調查旺角暴亂事件，而楊岳橋尋日就代表泛民議員向立法會提交呈請書，要求成立專責委員會調查旺角嚴重警民衝突經過同成因，以及就點樣避免再次發生衝突提出建議或措施。呈請書獲二十四名泛民議員起身支持，只欠涂謹申、張超雄同梁繼昌，但仍超過《議事規則》要求嘅二十人起身嘅門檻，過關成立。

「留紀錄盼下屆正視」

不過，何秀蘭「成功爭取」後隨即認衰，承認要成立呢個專責委員會之前，仲有好多委員會排緊隊，包括有關高鐵工程延誤嘅委員會仲寫緊報告，另有兩個關於前年佔領行動嘅專責委員會緊隨其後，未開展工作，要喺剩餘任期調查旺角騷亂嘅機會微乎其微，但佢仍然死撐泛民咁做，係希望將呢個要求記載喺會議紀錄內，呼籲下一屆議員要正視有關紀錄喎。

立法會經歷泛民連串拉布行動幾乎癱瘓運作，難得開始重回正軌傾正經事，泛民都要為咗留個紀錄而要求成立一個開唔到嘅委員會，甚至今屆嘅事要下屆跟進，唔知仲有乜嘢好跟進呢？莫非泛民想將暴徒變成良民？

第一手消息請下載on.cc東網iPhone/iPad/Android/Windows Phone Apps