問大家一個問題，如果一個醫生為病人做緊手術時突然被吊銷牌照，要佢馬上離開手術室，會有乜後果呢？唔好以為係天方夜譚吖，現實中真係有類似例子o架。

係咁嘅，青衣美景花園業主一三年集資一點七億元進行大廈維修工程，依家仲未完工，承建商突然收到屋宇署通知不獲續牌，維修工程被迫叫停，搞到業主唔上唔落半天吊，都咪話唔徬徨。呢，尋日有批居民到屋宇署請願，要求解釋承建商不獲續牌原因，並尋求協助，當局聽到未吖。

官僚就輕鬆喇，一聲令下將承建商停牌，問題係維修工程點收科呢？業主嘅損失邊個負責呢？今次事件影響二千戶居民，話就話可以另聘承建商執手尾，但工程開支勢必大增，萬一再傾唔掂數，工程隨時爛尾都似。正如有業主話齋，維修工程留低好多手尾，外牆工程未完成，冷氣機拆走後又未重新安裝，竹棚亦未拆卸，家陣都唔知點算好。

仲有吖，涉事承建商仲承接咗將軍澳景明苑等維修工程，唔止影響美景花園二千戶居民咁簡單o架。有關注團體要求港府一次過公開其他受影響屋苑資料，畀業主及早應對，並呼籲受影響屋苑業主組成聯盟，合力向承建商追討。

即係咁，屋宇署指承建商因為觸犯若干勞工安全罪而不獲續牌，咁都無可厚非，但都要考慮居民利益，唔好令業主無端端蒙受損失o架。正如建築業人士質疑，屋宇署續牌通知期過短，今次只得兩個星期，搞到業主措手不及。

再講喇，業主之所以委託相關承建商進行維修工程，都係因為持有屋宇署發出嘅牌照，家陣出現問題，官僚係咪責無旁貸吖？係咪應該幫業主諗吓點樣收拾爛攤子吖？

所以話，今時今日做香港人真係好難o架，冇屋住固然煩惱，有屋住同樣頭痛。除咗可能遇到維修工程半天吊，圍標問題更加引起怨聲載道，好似沙田翠湖花園維修工程咁吖，經過連番訴訟，工程進行咗幾年仍未埋尾，業主之間仲面左左添。樓宇維修本來係為咗改善居住環境，可惜由於當局唔監唔管，搞到爭議多多，居民真係多得官僚唔少。

點講都好喇，民生無小事，樓宇維修工程關乎無數業主及居民利益，唔到港府推卸責任，如果官僚繼續闊佬懶理，小心好似呢個承建商咁冇得續牌吖，叮！