巴菲特（中）穿上國產西裝被人讚，佢笑咪咪咁同公司管理層合照。
西裝係西方人嘅服飾，但股神巴菲特卻話，佢所有西裝全部「Made in china」，最鍾意嘅西裝亦全部係內地公司大楊創世嘅出品添。佢自己着之外，仲向老友全球首富兼微軟舵手蓋茨推介添。
李桂蓮（左）雖然唔曉英文，但同名人粉絲蓋茨一樣溝通得到。
股神九年前開始着大楊創世西裝時講過，話自己活咗七十八年，終於有人讚佢「好樣」，於是掉晒佢以前啲西裝。佢仲拉埋Friend落水，跟住巴郡副主席芒格同蓋茨都齊齊着國產。不過股神似乎齋Like啲西裝，唔多覺佢有入股呢間公司喎。
講番大楊創世，呢間公司嘅董事長李桂蓮出身農民，七九年用借番嚟嘅三萬蚊人仔起家，依家已經打造咗一間五千個僱員嘅高級訂製西裝王國，仲係上海上市公司。咪睇李總唔曉英文，用身體語言同股神一樣溝通得到，舊年佢哋攻入紐約曼哈頓，喺Brooks Brothers'旗艦店同區，開咗間四千呎嘅首間美國門市；近排又有聲氣話打算用大概二點三四億港元入股加拿大網購西裝公司Indochino添。聽講，連美國前總統喬治布•殊同內地前領導都係着佢哋嘅產品，咁多生招牌，真係唔憂賣。
第一手消息請下載on.cc東網
