佔領行動發起人戴耀廷早前密謀攪局，提出「雷動計劃」，但一班泛民以至本土派就接二連三向佢潑冷水，尋日卒之有民協願意上佢艘船，不過，馮檢基呢次擁抱「雷動」，會唔會搭沉船、或被轟到體無完膚，就冇人知喇。
民協近日向外公布會支持雷動計劃，更願意犧牲部分議席。據聞民協黨團昨日決定，會主動發信畀泛民會議其他政黨，齊齊開會商討合作的可能性。民協主席莫嘉嫻解釋，以往泛民經常浪費選票，好似新界西選區，明明夠票攞多一席，但因為分票不平均而搞到倒輸畀建制派，作為細政黨，預咗犧牲會大過大政黨，但佢哋都肯協調，希望最終取得過半數議席。佢哋呢兩星期就會約會主流泛民討論，佢評估若到五月都未能達成共識，雷動計劃就會壽終正寢。
不過，有人估計民協想以放棄參選俗稱「超級議席」的區議會（二）功能界別議席來交換地方直選議席，因為民協打算派出深水埗區議員何啟明參選超級議席，但知名度遠較其他有意參選人為低，分分鐘變陪跑，如果換取泛民協調地方直選，現任議員馮檢基可憑本身知名度力保一席，再加上重奪九龍西一席，或可以令民協起死回生。
第一手消息請下載on.cc東網
