政壇：黃偉鴻增值 淡市拓商機
經濟不景氣，商界叫苦連天，要積極諗計度過寒冬。做食品生意的中華廠商聯合會食品製造業委員會主席黃偉鴻（Ellis）話，佢公司旗下有五十幾間連鎖零食店，今年將趁淡市重新定位，並進行市場區隔及產品重組，以便站穩腳步迎接下一個旺市。
黃偉鴻將書本學到嘅智慧運用在生意上。
Ellis話，經濟好時企業只會一味向前衝，經濟欠佳時先可以為企業重新把脈再造，所以未必係壞事。見佢講到未來大計頭頭是道，原來係得到書本啟發。Ellis近年不停進修，依家讀緊比利時一間商學院嘅商學博士（DBA）學位，佢嘅論文題目正正係研究食品品牌定位及策略。
Ellis笑笑口話，由於睇咗大量文獻及資料準備寫論文，因此得到唔少啟發，於是運用在自己盤生意上。佢形容呢個先至係讀博士最大嘅得益，最終攞唔攞到學位唔係咁重要喎。
