政壇：陳克勤嘆書生唔易做

讀書人不時被人笑「百無一用是書生」，立法會議員陳克勤早前見過清朝書生用嘅書箱，就覺得書生唔易做，佢仲將書箱照放上社交網站分享，等大家見識吓古代讀書人嘅艱辛。

陳克勤喺林村一間舖頭見到呢個書箱，即刻合照同網友分享。（互聯網圖片）

克勤尋日喺社交網站上載一幅相，相中係佢同一個清朝嘅古箱，佢問網友，估唔估到個古箱有乜用途﹖有人估個古箱係盛載食物、嫁妝、戲服等，亦有人估係夾萬，甚至有人估係流動廁所添。

克勤其後揭曉，話佢喺大埔林村一間賣茶嘅舖頭見到呢個古箱，負責人話係清朝讀書人上京赴考時用嘅書箱。

佢解釋，呢個書箱淨重已二十幾三十磅，如果載滿書籍，分分鐘重達五十至六十磅，但清朝嘅書生就要孭住呢個五十磅嘅書箱長途跋涉上京赴考，真係少啲體力都搞唔掂。不過，可能當年呢個書箱係書僮負責呢？點都好，求學不易，依家嘅學生哥真係要珍惜喇。