政壇：快刀剪布「橄欖」變「監粗」

立法會議員陳鑑林一向被人叫「橄欖」，不過，佢做財務委員會代主席之後，因為主持會議剪布太有力，結果被人贈多個花名叫「監粗」。

佢呢個花名嘅來源係同泛民議員就拉布過招而嚟，事緣泛民主派就高鐵工程追加撥款提出咗一千二百多項拉布式動議，陳鑑林裁決後，大幅「剪布」削減至只有三十六項，尋日，佢又快刀斬亂麻提早表決通過撥款，結果因為太有力，畀人譏笑佢「監粗」剪布，應改名做「陳監粗」。花名滿天飛，皆因今時今日從政太惹火，好彩佢放棄角逐連任九月嘅立法會選舉，否則做多四年議員，睇怕其中一項收穫就係花名。