政壇：亞馬遜聲控鬧出禍
踏入二○一六年時，唔少科技界人士都話要開拓人工智能科技，facebook教主朱克伯格更將呢個計劃定為今年嘅大計。不過，人工智能其實並唔係新事物，依家都有一啲前期產品，譬如蘋果手機嘅SiRi功能及亞馬遜圓筒喇叭Echo都被視為呢一類。
講到亞馬遜個聲控家居智能裝置Echo，外形雖然只係一個喇叭嘅黑色筒，但佢都有個虛擬個人助理叫「Alexa」，只要先叫聲「Alexa」，就可以叫醒佢，然後用家可以吩咐佢播音樂、幫你校鬧鐘、校暗間屋啲燈，連上網幫你搵餐廳、甚至訂廁紙都得。
不過，有辣當然都有唔辣，早排就有個美國電台喺節目度講起Echo個Alexa，點知聽眾家庭嘅相關產品，以為係叫佢哋，所以呢啲Alexa以為主人有吩咐，於是一個二個醒晒，大家各有行動，有啲自動將主人屋企恒溫器調校其他溫度，有啲就自動轉播新聞……結果點？咪電台收投訴，亞馬遜就未回應囉。過癮嗎？可惜Alexa未識聽廣東話，所以呢啲搞笑嘢暫時未能喺香港見到。
