政壇：泛民戰功能界缺才
立法會選舉約半年後舉行，除了直選議席爭崩頭外，功能界別亦競爭激烈。有傳泛民主派有意派人出選功能界別，包括工程界和建築、測量、都市規劃及園景界等，事關呢啲界別都以個人票選民為主，泛民覺得有望爭位。不過，理想歸理想，現實情況係泛民人才荒，多個界別都搵唔到人參選，而佢哋嘅功能界別參選老將黎廣德同吳永輝試過陪跑滋味後，今屆各有打算，睇嚟泛民想開拓新議席真係冇咁易。
泛民今屆立會功能界別議席佔六席，全部都是個人票選民，包括教育界、法律界、社福界等。有泛民中人透露，他們有意協調候選人出戰其他個人票界別，包括由東區區議員王振星出選工程界；及在「思政築覺」等專業團體中找代表挑戰現任建築、測量及都市規劃界議員謝偉銓。至於為何較多個人票就代表一定會投畀泛民呢？就無人解釋到嘞。
消息話，由於大多數工程界選民都是土木工程師，與同為土木工程師的王振星「同聲同氣」，加上王振星形象獨立及年輕，似乎可以爭取中間派和銳意革新的選民支持。至於兩戰兩敗嘅公共專業聯盟黎廣德，就計劃退位讓賢，讓後輩發揮。不過作為當事人的王振星接受查詢時就極力否認參選，指剛當選區議員，會專注地區工作，多謝大家支持喎。
原地踏步打嘴炮
至於建築、測量、都市規劃及園景界亦面對同一困境，雖然公共專業聯盟吳永輝多次參選但都是無功而還，若九月捲土重來參選，似乎只會重蹈四年前覆轍，慘淡收場。有指泛民有意喺「思政築覺」等專業團體物色一啲年輕測量師出選呢個界別，但有關講法聽就聽咗好多次，但次次都未能交代人選，令人質疑泛民其實係打嘴炮，最後都係原地踏步。
