一件污，兩件穢，立法會烏煙瘴氣，拉布流會成為常態，唔止工程及民生受阻，連版權修訂條例亦被拉低，都咪話唔兒戲。正如「東方報業民意調查」顯示，大部分受訪市民直斥政客拉布禍港，港府招架無力，繼續咁樣搞落去，想唔攬住一齊死都幾難。

咁又係吖，反對派政治掛帥，為反對而反對，為拉布而拉布，已經到咗走火入魔嘅地步，而港府就束手無策，一味望天打卦，點可能有運行吖。有人形容反對派議員只識「推、拉、閃、抽」，有責任就「推」、有布就「拉」、點完人數就「閃」、有水就「抽」，為求選票不分是非黑白，漠視社會公義，係搞亂香港嘅「罪魁禍首」，真係一針見血。

不過咁，港產官僚亦唔好得幾多。好似負責推銷版權修訂條例嘅商務及經濟發展局局長蘇錦樑咁吖，渾渾噩噩，得過且過，撞板多過食飯，連建制派議員都批評佢「搞乜衰乜」，簡直係「豬隊友」。所以話，政客無良，政府無能，咪就係香港嘅現實囉。

古人話，寧失千金，莫失寸土。而港府就「推出一項、跪低一項」，既失千金，又失寸土，唔到你唔服。多數受訪市民認為港府頻頻跪低，日後施政更加寸步難行，唔係冇理由㗎，官僚成事不足，敗事有餘，一味添煩添亂，施政點可能暢順吖。

正所謂，一節見則百節知，立法會烏煙瘴氣，版權修訂條例受阻只係冰山一角咋。呢，連成立創科局都要經歷三次觸礁及長達三年半嘅拉鋸，最後至僥倖過關，講起都可悲。至於大型基建工程更加阻力重重，寸步難行，尤其係高鐵工程一拖再拖，造價一漲再漲，都唔知點樣收科。上述調查顯示，受訪者普遍擔心高鐵工程追加撥款過唔到立法會呢關，隨時要停工甚至爛尾，唔止成為國際笑話，更加係香港嘅超級災難添。

事實證明，當社會陷入政治泥沼，就注定冇運行。「港人治港」變成「拉布治港」，導致發展停滯不前，競爭力跌跌不休，加上港府內部好似一盤散沙咁，高官各懷鬼胎，行政混亂，更加衰多幾錢重。

好多人問，香港究竟可唔可以走出呢個困局？睇怕都幾難咯，隨着本土勢力抬頭，香港只會愈來愈激進，愈來愈暴力，拉布流會只係小兒科咋，日後立法會隨時上演六國大封相都似，叮！