城中鏡：「A貨橄欖」落區
話時話，親生兄弟有時個樣真係似到一睇就知！尋日屯門區議員何君堯喺屯門美樂花園嘅辦事處開幕，一個貌似立法會議員「橄欖」陳鑑林嘅身影突然出現，連語氣、聲線都似足橄欖，原來佢係橄欖親生大哥陳鑑波，兼香港潮汕客屬聯誼總會秘書長。陳鑑波都講笑話自己係「A貨橄欖」，仲試過路過屋邨時，有街坊同佢投訴垃圾問題。雖然兩兄弟好似樣，但陳鑑波強調，佢係唔可以代橄欖落區嘅！
陳鑑波笑指自己係「A貨」陳鑑林。
馬亞木（左）同馬僑生一齊到場賀何君堯辦事處開幕。
何君堯（左）話揀辦事處時，太太Cecilia（右）都有畀意見。
何太獻策擺聯求平和
講起細佬，陳鑑波就話橄欖性格「理所當然」啲，自己做大佬就較順得人。雖然佢比橄欖大兩年，但原來細個時通常都係佢被人「蝦」，橄欖就代出頭。佢憶述當年住木屋區，試過畀壞分子「蝦」，橄欖知道後話「使乜驚佢哋呀！」仲代佢出頭。估唔到平日滿臉笑容嘅橄欖年少時咁英勇。
雖然何君堯同陳鑑波識咗好一段時間，但原來佢唔知對方係橄欖大哥，仲話講落先覺得有啲似樣。而尋日開幕禮，新界鄉議局副主席林偉強、「小巴大王」馬亞木同兒子馬僑生都有出席。何君堯話辦事處嘅優點係地舖，夠晒接地氣喎。何君堯太太亦都有嚟辦事處撐老公。何君堯話揀呢個辦事處時太太都有畀意見，仲建議擺副對聯喺辦事處，等佢心平氣和啲。
另外，馬僑生就提起自己二十一歲時喺爸爸鼓勵下，考咗一次就考到小巴牌，私家車就反而考咗兩次。而佢幫手家族生意後都試過喺小巴站頭遇到壞分子，但都唔使爸爸幫手，仲話有時同對方傾吓都解決到，睇嚟佢嘅談判技巧唔錯喎。
