政壇：K金大王新抱 戴珠鏈有竅妙
「K金大王」、香港潮州商會會董胡楚南，近年除咗K金生意外，仲賣埋鑽石珠寶，有關生意交畀新抱Carmen王凱曼處理。Carmen日前戴住條珍珠頸鏈現身，佢教路指珍珠都需要小心護理，就好似人要做facial咁，先可以保持靚靚。
胡楚南（左）嘅鑽石珠寶生意，已交由王凱曼（右）幫手打理。
Carmen話珍珠本來就生長喺珍珠貝中，可以話係有生命嘅珠寶，其表面嘅顏色會因應生長同保存環境改變，所以如果買咗返屋企後，只放喺夾萬中儲存，珍珠會焗到變黃，因此應該不時拎出嚟「抖抖氣」，同埋用軟布輕輕抹吓。Carmen當日紮住一條馬尾，原來亦另有用意，佢話頭髮上嘅定型噴霧、髮蠟同唔少女士都鍾意用嘅香水，當中嘅化學物都會令珍珠顏色有變甚至暗啞，戴珍珠鏈時要多留意喇！
