政壇：「邱副」吹雞踩車 一個圈唔夠喉
香港官場被稱為「熱廚房」，唔少官員都會趁假日做運動減壓。四個副局長同政治助理尋日就齊齊組隊踩單車。話說尋日有個單車比賽活動，途經昂船洲大橋。運輸及房屋局副局長「邱副」邱誠武就乘機吹雞，約埋商務及經濟發展局副局長梁敬國、政制及內地事務局副局長陳岳鵬同保安局政治助理劉富生齊齊踩單車。
邱誠武（左）同梁敬國齊參加單車比賽活動，仲喺南灣隧道前留影。（互聯網圖片）
舊年已經有參加呢個活動嘅嘉賓隊賽事嘅梁敬國就話，賽事一個圈先得十三公里，佢同邱副都唔夠喉，所以就再踩多個圈喎。不過陳岳鵬就覺得尋日天時同人和唔太啱key，皆因天氣又熱又濕，踩落比較辛苦。而本來都係隊友之一嘅食物及衞生局副局長陳肇始就因為早前隻手受傷未好番，所以只能做啦啦隊打氣喇！
