政壇：搞搞政：力銷配票廢策 戴耀廷遭圍插
喺港大法律學院副教授戴耀廷提出「雷動計劃」後，好多泛民政黨、傘後組織同本土派都大潑冷水，但佢仲未知衰，尋日喺一個論壇上推銷，結果遭圍插。佢起初解釋計劃時稱，每個選區須招募一至兩萬名選民，承諾會策略性投票，由當區義工按民調喺投票當晚公布邊隊名單有機當選，至於暫時唔夠票嘅名單，則呼籲該批選民集中票源支持。
戴耀廷呢個憑空想像嘅計劃，未有落實時間表已被批評至一文不值，熱血公民成員鄭松泰仲表明絕對唔認同計劃，認為冇提理念，形容係「泛民分飯票、分餅仔」，即為咗分議席而做，重申佢哋提出當選議員後立即辭職，變相公投就可以為選民提供選擇。
合照證早識梁天琦
屬主流泛民嘅白鴿黨總幹事「阿廷」林卓廷亦質疑，指戴提出計劃嘅出發點係好，但有好多操作問題未解決，好似究竟點樣可藉民調顯示邊張名單係有機會夠票當選，一旦操作唔理想，隨時夠票名單變唔夠票，唔夠票名單幫咗都仲係唔夠票。阿廷其後又向鄭松泰「開火」，稱本土派協調就為理念，傳統泛民協調就為「飯票」，質疑雙重標準。面對多方質疑，戴只輕描淡寫解釋，話若果係認同理念嘅話，技術問題唔係解決唔到，指會喺四、五月視乎進程決定係咪付諸實行。
另外，戴耀廷被揭同本土民主前線梁天琦係舊相識，有網站提供照片力證二人曾同枱食飯兼合照，翻查資料顯示，該張合照攝於二○一三年十一月，戴出席港大利瑪竇堂高桌晚宴任嘉賓，梁則係座上客。
