外號「國師」嘅本土派學者陳雲、其門生中出羊子，同埋由本土民主前線發言人黃台仰一手提攜嘅梁天琦，都表明有意喺九月立法會選舉循新界東出選，令本土派支持者擔心三人會互相分薄票源「攬炒」。陳雲近日突然喺其社交網站專頁，上載一篇黃台仰喺多月前進行嘅專訪，講述咗陳雲、中出羊子同佢本人嘅一段「盾牌因緣」，仲疑似暗示黃台仰加入社運圈子，都係由佢而起。

黃台仰喺專訪中透露，自己好早就參與社會運動，但以前同圈中人唔熟，一來係好多小有名氣嘅人都自認係「救港神仙」，唔易溝通；二來佢知道圈中關係錯綜複雜，是非之多，令人卻步。

或擬拉攏協調選舉

黃又話直至前年佔領期間，佢喺社交網站睇到中出羊子正在製造木板盾牌，其後「不要臉地」向中出羊子要求攞一啲嚟用，結果中出羊子、佢本人同其同伴，一齊喺中出羊子嘅工作室被捕。當時佢擔心中出羊子會以為佢哋係「鬼」而害佢被捕，但係中出羊子唔止冇生疑，仲向佢哋道歉賠償，而中出羊子喺被拘留期間展現「真誠和堅定的意志」，更改變咗佢對整個社運同政治嘅認識。佢又形容中出羊子承載住城邦派嘅「獨有氣質」，「男身女裝」嘅外表睇起嚟唔易接受，但深入了解後卻能夠睇到當中「玄機」。

成篇專訪其實冇提到陳雲，但陳雲卻為專訪加上引言，指「一場因緣。陳雲教人造盾，昭明公主（中出羊子）大量生產木盾，黃台仰參與造盾而與昭明公主一同被捕，令黃台仰感受到昭明公主的非凡能力。」莫非佢想藉住呢個緣起，拉攏三方協調選舉部署？

第一手消息請下載on.cc東網iPhone/iPad/Android/Windows Phone Apps