俗語有話，同人唔同命，同遮唔同柄。前全國政協委員劉夢熊因妨礙司法公正而身陷囹圄，仲捱唔住鐵窗生涯而搞到入廠添，而身兼全國政協委員嘅前廉政專員湯顯明就風騷得多，就算孭住連串貪腐醜聞，一樣大搖大擺上北京參加兩會，問你服未。

係咁嘅，全國人大、政協兩會喺北京召開，淪為過街老鼠嘅貪湯居然好意思出席。最好笑嘅係，佢日前現身香港機場時，被記者追問有冇擔心貪腐醜聞影響北大人對佢嘅睇法時，全程黑面，粒聲唔出。咁又難怪嘅，貪湯淪為香港開埠以來首名被廉署調查嘅廉政專員，雖然獲律政司放生，逃過刑事檢控，但早已臭名遠揚，點可能唔面黑吖。

所以話，貪湯嘅處境真係好狼狽o架。如果繼續匿埋，等於默認做過唔見得光嘅事，但蒲頭又淪為眾矢之的，避都避唔開。今年兩會焦點除咗經濟同兩岸等問題備受注目之外，反貪腐仍然係主旋律之一，貪湯作為座上客，何只係格格不入，直頭係絕大諷刺喇。冇錯，全國政協向來被批評藏污納垢，但第五代上場後全力反腐，對貪官嚴懲不貸，連「大老虎」全國政協副主席令計劃亦不能幸免，為官場開創一片新氣象，貪湯出席政協會議，豈不是唔衰攞嚟衰？

冇誇張o架，貪湯在任廉政專員期間，被傳媒踢爆亂花公帑、假公濟私、向內地官員送禮、「茅台換政協」等連串醜聞，簡直同內地貪官冇分別。事件引起全城嘩然，唔止廉署立案調查，立法會仲多次公開「譴責」同「痛斥」添，咁嘅政協委員簡直就係國家反貪工程嘅負面宣傳喇。

所以話，出得嚟行，預咗要還。貪湯雖然獲得律政司放生，但唔代表佢可以甩難，廉署已經去信公務員事務局，要求跟進貪湯涉及嘅違規情況，隨時有更多唔見得光嘅醜行被公諸於世。公務員事務局局長張雲正亦已經講到明，貪湯案情況特別，正研究以何種方式採取行動。其實計太一叮話齋，採用邊種行動方式都唔緊要，最重要係執正嚟做，還市民一個交代，畀廉署一個重生機會。近年香港廉潔指數每況愈下，國際排名跌跌不休，依家係時候重新整頓喇。

總而言之，善有善報，惡有惡報；時辰一到，一切都報。前政協委員劉夢熊已經得到應有懲罰，唔知幾時至輪到貪湯呢？叮！