城中鏡：林仕超太空公幹
早前福建社團聯會青委同潮青舉行春節聚會，福建青委主任Lawrence林智彬、前主任Stanley黃楚恒同潮屬社團總會青委主席張俊勇等幾十名兄弟姊妹齊出席。明年將到太空旅遊嘅Sinomax寢具生產商盛諾集團總經理Ken林仕超亦有現身。咪以為阿Ken已玩遍地球先挑戰太空，佢話自己其實唔係特別鍾意旅行，仲自爆畏高添！
林仕超（左）將到太空旅遊，Pauline（中）同林玥彤都好羨慕。
張俊勇（左起）、林智彬同楊華勇與閩潮青年齊歡聚。
農曆新年期間黃楚恒（右）增添第五個BB，身旁劉文文都戥佢開心。
阿Ken話今次旅程只係穿越地球同太空之間嘅「卡門線」，未穿過大氣層，停留五、六分鐘就返地球，全程只係一個多小時，故對參與者體能要求冇太空人咁嚴格，一般健康嘅人皆可參加，只係價錢唔平成一百七十幾萬元。佢間家族公司係贊助商，加上太空旅遊搞手係佢好友，所以今次旅行係寓娛樂於工作。佢妺妹Pauline就呻話，下次有機會都好想去試吓喎。
林玥彤勸港人輕名利
同場仲有百仁基金副會長楊華勇、潮州商會會董劉文文同靚女心理學家Candice林玥彤等人。Candice話港人嘅情緒健康問題日益普及，客人之中有唔少小朋友，故奉勸港人咪太睇重物質同名利。
講到壓力，面對淡市嘅商界壓力一定唔細，但Lawrence就開心晒，事關佢最近入股港產陀飛輪萬希泉做股東，因為佢做萬希泉嘅台灣同福建代理多年，見市場潛力好大，所以索性投資做股東，盼喺事業上闖出一片新天地。
