近年本土派急速冒起，喺剛過去嘅立法會新界東補選中，本土民主前線梁天琦雖落敗，但得票率達一成半，可預見九月立會選舉競爭將非常激烈。自八五年進身區議會、八六年出任區域市政局議員、九一年起任立法局議員嘅「大舊」陳偉業，最近曾放風唔再競逐連任。雖然佢事後改口話適當時候先公布係咪繼續參選，但佢最近就開始整理各辦事處嘅物品，仲將部分舊相送畀相關議員，莫非佢打算響應換代呼聲急流勇退？

陳偉業

九六年青馬大橋仍在興建，一身裝備嘅大舊企喺橋上拍照留念。（受訪者提供）

九十年代，大舊（左一）聯同一眾民主黨成員李華明（右二）、張文光（右一）與劉慧卿（左二）等，喺新華社外街頭抗爭。（受訪者提供）

大舊最近忙於整理一疊疊舊相片，部分要掃描入電腦珍藏。

喺議會打滾近三十年嘅大舊，仕途並非一帆風順，○四年以獨立身份參選一度陷入出局邊緣，最終以三萬六千多票取得新界西最後一席。到○八年掛起社民連牌頭出選，亦僅以三萬二千多票取得尾席。及至一二年立會選舉，就以四萬四千多票順利取得議席，重拾聲威。

忙存檔或贈議員

至於大舊整理嘅一堆陳年舊相，唔少都有珍藏價值，其中一張係九六年佢企喺青馬大橋地盤上拍攝，相信唔係太多人可影到。另一張就係九十年代所攝，當年仲係白鴿黨成員嘅佢，聯同劉慧卿、李華明、張炳良等喺新華社外街頭抗爭。大舊話呢批相係喺唔同地區嘅辦事處攞番立會辦公室，由於已積壓咗幾箱相片，所以最近忙於整理，部分相片會掃描存入電腦，而啲重複嘅相，佢就轉贈畀其他相關議員。

第一手消息請下載on.cc東網iPhone/iPad/Android/Windows Phone Apps