政壇：曾鈺成亂讚梁天琦 陸頌雄轟「腦灌水」
話說本土民主前線梁天琦喺立法會新界東補選中獲六萬六千票成為焦點，立會主席曾鈺成日前就大讚梁天琦喺競選過程中表現相當出色，助選團隊亦好高質素，結果惹嚟建制派內部批評。工聯會元朗區議員陸頌雄喺社交網站發文炮轟曾鈺成竟然大讚參與暴亂嘅人，仲希望係曾鈺成「洗頭時唔小心地腦子灌水」先一時失言。
陸頌雄（左圖）炮轟曾鈺成（右圖）讚梁天琦表現出色係「腦灌水」。（資料圖片）
陸頌雄文中炮轟曾鈺成「有冇搞錯？你作為愛國陣型（營）的icon（象徵），竟大讚梁天琦」。對於曾鈺成讚揚梁天琦表現出色，陸要求對方講清楚乜嘢係出色，又質疑對方仲有無立場同是非黑白之分，言論相當惹火。陸接受查詢時話，社交網站所寫嘅內容只係有感而發，強調只代表個人立場，同工聯會完全無關。
佢解釋，最初係收到街坊投訴，後來認為曾嘅講法會令好多支持建制派嘅人難以接受，所以喺社交網站上抒發個人感受。佢又話如果係讚梁天琦口才好、靚仔，佢無意見，但就唔明梁有乜優秀，「係資源多？掟磚？定係網絡欺凌？」未知曾鈺成今次傷害咗幾多建制派人士嘅感情呢？
