政壇：中出羊子話梅止渴
舊年曾參選區議會嘅港獨人士、外號「昭明公主」嘅中出羊子（原名鍾銘麟），除喺尋日凌晨表明有意參與九月立法會選舉，同日中午仲就選舉一事去觀音廟求籤指點迷津，結果求得中籤。籤文上嘅古人為「曹操話梅止渴」，難道係指佢嘅政途未如理想，勸佢放棄參選立會？
中出羊子為參選求籤獲點化「話梅止渴、食也難吞」。（互聯網圖片）
中出羊子喺社交網站上表明有意參戰九月立會選舉，稱會出選新界東或九龍西選區，若佢出戰新東，勢將與被稱為「國師」嘅本土派學者陳雲「攬炒」。有留意本土派動向嘅人都知，中出羊子同陳雲私交甚篤，甚至有人稱佢為陳雲嘅「入室弟子」，若佢哋同喺新東出戰，咁咪係師徒決裂？中出羊子表明有意出選後不久，又喺社交網站上載一張觀音靈籤相片，話係觀音對佢有意參選嘅建議。
「恰似畫餅 食也難吞」
該支為觀音籤第十七籤、中籤「曹操話梅止渴」，籤文為「莫聽閒言說是非 晨昏只好念阿彌 若將狂語為真實 畫餅如何止得飢」。大意係話曹操率軍去打仗，時值炎熱季節，士兵汗流浹背，喉乾舌燥，但搵唔到一滴水。曹操就話前面有一大片梅林，到時就可以食梅解渴嘞，士兵聽到充滿期待，當堂唔覺口渴！未知係咪點化想參選嘅中出羊子「諗吓好喇」？
籤文亦附有解說：「心中不定 枉看經文 恰似畫餅 食也難吞」，或係指中出羊子性情不定，會受流言蜚語影響，若佢執着將一切虛假嘅事當真，閱讀經文亦只會枉費心神，比喻為食一張畫有大餅嘅紙，不能充飢亦難吞下。未知佢所求籤文係咪同陳雲出選有關？係咪勸佢讓路，避免攬炒？
