「霓虹燈光，購物天堂，自由都市，百業繁旺」，許冠傑呢首《洋紫荊》當年唱到開巷，但今時唔同往日囉，依家社會百業凋敝，昔日明珠變得人老珠黃，再冇呢支歌仔唱咯。

嗱，昂坪纜車曾幾何時號稱全世界最長嘅吊掛式系統，吸引唔少旅客慕名而至，可惜盛極而衰，客量一年不如一年，昂坪纜車尋日公布訪客數字，去年全年僅一百六十二萬人次入場，比一四年嘅一百八十三萬，下跌足足超過一成咁大鑊，都咪話唔驚人。

呢張成績表滿江紅，唔打屁股都要罰留堂啦。而昂坪纜車例牌又藉口多多嘅嘞，今次就話受天氣同纜車維修日數等影響，令到營運日數相對地較少，所以每日平均訪客跌至五千人咁話喎，餐餐賴天賴地，就係冇自我反省，呢啲咪就係官僚作風囉。

其實公道啲講句，家陣冇乜生意嘅唔只淨係昂坪纜車，大家有眼睇，本港兩大主題公園公布去年業績，遊客都減少一成以上，香港迪士尼樂園更錄得虧損添。一句講晒，家陣遊客買少見少，生意難撈，就算景點如何努力搵客，都係巧婦難為無米炊嘅咋。

冇辦法，旅遊業唔止步入寒冬，幾乎進入冰河時期添。內地經濟面臨下行壓力、港元匯率高企，固然都係原因，最大問題係本地激進組織一時驅蝗，一時鳩嗚，一時光復，等同於當年「華人與狗，不准進入」一樣歧視內地客，畀着你都唔會貼錢買難受啦。

正所謂，一榮俱榮，一損俱損，點止大型旅遊景點門可羅雀吖。正如旅遊業人士透露，農曆新年期間訪港內地團大跌七成，酒店業自然首當其衝啦，今年話就話維持約八成多入住率，但實際上房價面對下調壓力，想唔割喉式減價搶客都唔得啦。

遠嘅唔講，就以太一叮一位內地親友為例吖，以前香港酒店人滿為患，特別係農曆新年，閒閒地幾千蚊一晚都未必有位，因此要一早預訂房間，今年唔使九百蚊一晚，佢滿心歡喜以為執到寶啦，點知後尾發現即時入住只需五百蚊，即係冇乜人入住喇。再咁落去，遲早關門都得咯。

講到尾，香港人真係犯賤嘅，客多你又嫌人煩，客少又呻無啖好食。家陣遊客大減，的確係耳根清淨，不過咁多從業人員點搵食呢，唔通要練定「辟榖」大法，餐餐吸風飲露等運到吖，叮！