城中鏡：夏威夷歎世界 戴妮廷玩自拍
春節假期之後，打工仔大都歸位搏殺，著名攝影師戴妮廷最近都更新佢嘅社交網站，原來佢去咗夏威夷，仲喺下榻嘅酒店度假村中玩自拍添。
戴妮廷喺檀香山酒店打卡，並喺房間玩自拍。
戴妮廷擅長影靚相，過去曾經同唔少名人、明星合作，近年留港嘅時間較少，經常周遊列國。近日，佢喺社交網站自揭芳蹤，喺夏威夷酒店打卡之餘，仲大讚身處嘅酒店度假村設施好、直頭無懈可擊咁話，當地氣候宜人，同香港嘅十幾度寒意大不相同，戴妮廷就一襲低胸背心短裙，喺酒店房間玩自拍，睇佢開心嘅樣，真係人生一樂也！
