城中鏡：李文恩撈起
農曆新年長假係唔少人出國旅遊嘅高峰期，香港青年工業家協會早前舉辦新春團拜活動，該會執委兼理文化工首席執行官李文恩同太太Lorinda亦有現身，佢哋就話同家人去咗新加坡過年，話當地人每逢農曆新年必食「撈起」，即魚生同蔬菜絲逐一加入，撈埋一碟，每加一款食材，就要講一句恭賀說話，然後邊拌勻邊講「撈起、撈起」，寓意風生水起，愈撈愈旺。
李文恩（右）與太太Lorinda去咗新加坡度歲。
張華強（左）與太太Gigi於日本四國過年。
顏吳餘英（右）與兒子顏志永同家人在農曆新年遊大阪。
當日團拜晚宴有不少成員都以中國服飾現身，見李文恩夫婦套衫中西合璧，又夠傳統特色，原來係Lorinda幫丈夫親自挑選，仲話唔同牌子嘅碼數都有差異，所以每次都攞住老公件衫去買就最穩陣喇。李文恩就話，平日工作，除咗出席活動外，甚少穿着西裝，今次呢套有中山裝元素嘅服飾，就覺得好舒適，會考慮着多啲喎。
張華強自駕遊四國
香港青年工業家協會基金會常委顏吳餘英同兒子兼協會執委顏志永亦有到場，顏太喺今個農曆新年，就同家人及朋友一大班人去咗日本大阪，顏太仲拉埋丈夫陪佢一齊排隊買手袋，婦唱夫隨。
至於會長張華強就喺晚宴玩玩新意思，請來堪輿學家同大家講解流年運程，又教大家睇相，氣氛好熱鬧。張華強同太太Gigi剛由日本四國返港，兩人拍拖自駕遊，相當浪漫。Gigi笑言，平日喺香港好少揸車，被丈夫笑個女仲有天分過佢，所以今次去日本就練習吓，由落機揸到上機，丈夫就做人肉導航，但仍錯過鳴門海峽漩渦景點個路口，只係經過望到一眼。
