政壇：四個大男人密煲湊仔經
立法會尋日有個會外會，參加者係陳恒鑌（Ben）、漁農界議員（高佬賢）何俊賢、勞工界郭偉强同深水埗區議員鄭泳舜，佢哋唔係傾立法會同區議會合作，而係四個大男人聚埋一齊，交流吓湊仔經。
陳恒鑌（左二）等見到郭偉強（右二）呢個新爸爸疲態盡露，忍唔住互相交流吓心得。（互聯網圖片）
洩露呢個機密嘅係阿Ben，佢喺社交網站上載咗張相，只見佢同高佬賢、郭偉强同鄭泳舜密密傾，阿Ben話，新任爸爸郭偉强前日從醫院接咗初生兒子回家，點知仔仔喊個不停，成晚通宵為兒子「服務」後，郭偉強不禁露出疲態，咁啱有「多仔公」之稱嘅鄭泳舜尋日亦喺立法會，於是佢哋即場分享湊仔經。阿Ben話，佢係聞風趕到，除了溫故知新，也做好心理準備，因他已忘記之前湊女嘅細節，話好快又輪到佢喎，至於高佬賢，則係被捉嘅，佢哋鼓勵高佬賢努力造人，早日加入呢個好爸爸陣營。
