做好一份工，朝九晚十一、筋疲力竭、日以繼夜、夜以繼日仲未夠，好似班上市公司掌舵人咁，高薪厚職嘅背後，佢哋更要親身試產品，話之要男士脫毛、去皺，或試穿戰衣，吃生物科技製品，為咗上市，幾盡都要做呀。
鄧志輝試用緊公司嘅脫毛療程，一展青靚白淨嘅新LOOK。
近日經營DR REBORN嘅醫思醫療公開招股，公司創辦人兼CEO鄧志輝同COO李嘉豪不斷曝光，原來佢哋都做咗自家脫毛療程，亦做緊脫鬚根療程，實行做真人騷，示範朝早慳唔少剃鬚時間，就可以執正個Look。
唔講唔知，脫幾條毛髮對搞公司上市嘅高層嚟講真係小兒科，好似人稱「卡賓先生」嘅卡賓主席楊紫明，次次出場都度身訂造自家設計嘅戰衣，就係要突出時尚品味兼成為焦點；專做透明質酸嘅華熙生物科技主席趙燕雖然少公開露面，但佢承認用咗自家產品十年，睇番新舊照片對比都未驚過。其他仲有瑞年國際主席兼CEO王福才醫院院長出身，每日都食用自家品牌氨基酸片，經常四出路演，依然精神奕奕，總之，自家有乜，大老闆試咗先，顧客先有信心嘛。只係，咁樣一來，會唔會啲高級管理人員搵工跳槽，需要考慮多一項因素呢？
第一手消息請下載on.cc東網
